Back

ለኢንዱስትሪ ምርቶች ድጋፍና ክትትል በማድረግ በዓለም ገበያ ላይ ተወዳዳሪ እንዲሆኑ ሊሰራ ይገባል ተባለ

OBN መጋቢት 17፣2011  የኢኖቬሽንና ቴክኖሎጂ ሚኒስቴር ለኢንዱስትሪ ምርቶች ድጋፍና ክትትል በማድረግ በዓለም ገበያ ላይ ተወዳዳሪ እንዲሆኑ ለማድረግ ሊሰራ እንደሚገባ ተገለፀ።

የኢፌዴሪ የሕዝብ ተወካዮች ምክር ቤት 4ኛ ዓመት የስራ ዘመን 29ኛ መደበኛ ስብሰባውን በዛሬው ዕለት አካሂዷል።

በስብሰባውም የኢኖቬሽንና ቴክኖሎጂ ሚኒስቴር የ9 ወራት የእቅድ አፈጻጸም ሪፖርትን ገምግሟል።

በሪፖርቱም የኢኖቬሽንና ቴክኖሎጂ ሚኒስቴር ባለፉት ዘጠኝ ወራት በርካት የፈጠራና የምርምር ስራዎች መከናወን መቻሉ ተገልጿል።

በዚህ መሰረትም ተቋሙ ከትምህርት ሚኒስቴር፣ከግብርና ሚኒስቴር እና ከሌሎች አጋር ድርጅቶች ጋር በመቀናጀት የተለያዩ የቴክኖሎጂ ውጤቶችን በተለያዩ  የሀገሪቱ  ክፍሎች ተደራሽ እንዲሆኑ ተሰርቷል ነው የተባለው ።

በሀገሪቱ ያለው የፋይናንስ አሰራር ሂደት ተቋሙ የሚያከናውናቸውን የተለያዩ የፈጠራና የምርምር ስራዎች በተገቢ ሁኔታ እንዳያካናውን ተግዳሮት መሆናቸውም  በሪፖርቱ ተመላክቷል።

ከዚህ  ባለፈም ድርጅቱ  በስሩ ካሉት ተቋማት ጋር ያለውን ግንኙነት በማቀናጀት የተለያዩ አዳዲስ የፈጠራ ዉጤቶች ወደ ገበያ እንዲወጡ ከማድረግ አንፃር ክፍተቶች መስተዋላቸው ተነስቷል።

በሀገሪቱ  ያሉትን የኢንዱስትሪ ምርቶች በዓለም አቀፉ ገበያ ላይ ተወዳዳሪ ለማድረግ ድርጅቱ ዓለም የደረሰችበትን የቴክኖሎጂ ደረጃ ግምት ውስጥ በማስገባት በጥንካሬ ሊሰራ እንደሚገባ ተመልክቷል።

በሌላ በኩል የኢኖቬሽንና ቴክኖሎጂ ሚኒስቴር በሚቀጥለው ዓመት መጀመሪያ ላይ አንድ ሳተላይት ወደ ህዋ የሚያመጥቅ መሆኑ ተጠቁሟል።

ወደ ህዋ የማምጠቅ ስራውን ለማከናወንም የሳተላይት ግብዓቶችን ከማሟላት ጀምሮ የተለያዩ ቅድመ ዝግጅቶች እየተካሄዱ መሆኑ ነው የተገለፀው።

የእንቦጭ አረምን በተመለከተም አረሙን የተለያዩ የቴክኖሎጂ ሂደቶችን በመጠቀም ወደ ተለያዩ ጠቃሚ ግብዓቶች ለመቀየር እየተሰራ መሆኑም በሪፖርቱ ተመላክቷል።

ምክር ቤቱ ዛሬ በካሄደው መደበኛ ስብሰባ የተንቀሳቃሽ ንብረት ላይ ያለ የዋስትና መብት ረቂቅ አዋጅን መርምሮ ለሚመለከተው ቋሚ ኮሚቴ መርቷል።

ዋስትናው  ዘመናዊ የብድር ስርዓት ግለሰቦች እና ተቋማት ተንቀሳቀሽ ንብረታቸውን በዋስትና በማስያዝ ስራ ላይ የሚያውል አዲስ ካፒታል ማግኘት እንዲችሉ የሚፈቅድ ነው ተብሏል።