Back

ማይናማር ውስጥ ታስረው የነበሩት ሁለቱ የሬውተርስ ጋዜጠኞች ተፈቱ

OBN ሚያዚያ  292011  ማይናማር ውስጥ ታስረው የነበሩት ሁለቱ የሬውተርስ ጋዜጠኞች ተፈቱ

ማይናማር ውስጥ በሮሂንግያ ማህበረሰብ ላይ በተፈጸመው ጥቃት ዙሪያ በሰሩት ዘገባ ምክንያት ታስረው የነበሩት ሁለቱ የሬውተርስ ጋዜጠኞች መለቀቃቸው ተነግሯል።

የ33 ዓመቱ ዋ ሎን እና የ29 ዓመቱ ክያው ሶ ኦ ከእስር የተለቀቁት በተደረገላቸው ፕሬዚዳንታዊ ምህረት መሆኑም ተሰምቷል።

ሁለቱ ጋዜጠኞች በያንጎን ዳርቻ በሚገኝ እስር ቤት 500 ቀናትን አሳልፈዋል።
የሬውተርስ ጋዜጠኞች በዘገቡት ምክንያት ባለፈው መስከረም ወር የ7 ዓመት እስር ተወስኖባቸው ነበር።

ውሳኔው በፕሬስ ነጻነት ላይ የተቃጣ በደል ተደርጎ በብዙዎች ዘንድ የተወሰደ ሲሆን የማይናማር የዴሞክራሲ ሂደት ላይም ጥያቄ አጭሯል።
ከእስር ከተፈቱት ጋዜጠኞች መካከል ዋ ሎን ጋዜጠኝነቱን መቼም እንደማያቆም ተናግሯል።

የሬውተርስ ዓለም አቀፋዊ የዜና ማዕከል ዋና አዘጋጅ ስቴፈን ጄ አልደር ሁለቱ ጋዜጠኞች በዘገቡት ጉዳይ ባለፈው ወር የፑሊትዘር ሽልማት ማሸነፋቸው የፕሬስ ነጻነት ምልክትነታቸውን ያሳያል ብሏል።
ማይናማር ብርቱ ጋዜጠኞቻችንን እንድትፈታ ብዙ ጊዜ ወትውተናታል ነው ያለው ዋና አዘጋጁ።
ሁለቱ ማይናማራውያን የሬውተርስ ጋዜጠኞች በምርምራ ዘገባቸው ጾታቸው ወንድ የሆኑ 10 ሮሂንጊያ ማህብረሰብ አባላት በ2017 መስከረም ወር ኢን ዲን በተባለ መንደር ውስጥ በወታደሮች መገደላቸውን ይፋ በማድረጋቸው ነው ታስረው የነበረው።

ሀገሪቱ ከሁለቱ የሬውተርስ ጋዜጠኞች ባሻገር በሺዎች የሚቆጠሩ እስረኞችን በምህረት ለቃለች።
ምንጭ፦ቢቢሲ