Back

በማይናማር አውሮፕላን ያለፊት ጎማ በማሳረፍ ህይወት የታደገው ፓይለት አድናቆት ተቸረው

OBN ግንቦት 052011   በማይናማር አንድ ፓይለት ሲያበራት የነበረችው አውሮፕላን ልታርፍ ስትል የፊት ጎማዋ ሊወጣ ባለመቻሉ ፓይለቱ ባደረገው ጥረት በሰላም ልታርፍ ችላለች።

የማይናማር ብሔራዊ አየር መንገድ ንብረት የሆነችው አውሮፕላን በዚህ ሁኔታ ያረፈችው ማንዳላይ አየር ማረፊያ ላይ ነው።

ፓይለቱ አውሮፕላኗን ለማሳረፍ በሚጥርበት ጊዜ ክብደቷን ለመቀነስ በአውሮፕላኗ ውስጥ የነበረው ነዳጅ እንዲያልቅ ሰዓታትን በአካባቢው በማንዣበብ አሳልፏል።

በመጨረሻም ፓይለቱ የአውሮፕላኑን አፍንጫ መሬት ከማስንካቱ በፊት የኋላ ጎማውን ማኮብኮቢያው ላይ ማሳረፍ ችሏል።

በዚህም በአውሮፕላኗ ተሳፍረው የነበሩት 89 መንገደኞች ምንም ዓይነት ጉዳት ሳይደርስባቸው በሰላም መውረድ ችለዋል።

አውሮፕላኗ በሰላም ማረፏን ተከትሎ የማይናማር የትራንስፖርት ሚኒስቴር የፓይለቱ ስራ እጅግ የሚደነቅ ነው ብሏል።

በአገሪቱ ባለፈው ሳምንት አጋማሽም 17 ሰዎች ላይ ጉዳት ያደረሰ አደጋ የተከሰተ ሲሆን፥ የአሁኑ አጋጣሚ ለሁለተኛ ጊዜ እንደሆነው ለማወቅ ተችሏል።

ምንጭ፡- ቢቢሲ