Back

የተቋማትን መረጃዎች በቀላሉ ማግኘት የሚያስችሉ ቴክኖሎጂዎች አገልግሎት

ጥር 28፣2008

ህብረተሰቡ ወደተለያዩ መስሪያ ቤቶች ሳይሄድ የተቋማትን መረጃዎች በቀላሉ እንዲያገኝ የሚያስችሉ ቴክኖሎጂዎችን አገልግሎት ላይ ማዋሉን የመገናኛና ኢንፎርሜሽን ቴክኖሎጂ  ሚኒስቴር ገለጸ፡፡

ሚኒስቴሩ ከአስራ ስምንት በላይ የሞባይል አፕልኬሽኖች፣ 8 ዌብ ፖርታሎችና ሌሎች የማኔጅመንት ኢንፎርሜሽን ሲስተም አገልግሎቶችን ዛሬ አስመርቋል።

በምክትል ጠቅላይ ሚኒስትር ማዕረግ የፋይናንስና ኢኮኖሚ ክላስተር አስተባባሪና የመገናኛና ኢንፎርሜሽን ቴክኖሎጂ ሚኒስትሩ ዶ/ር ደብረጽዮን ገብረሚካኤል እንዳሉት እነዚህ ሲስተሞች የዜጎችን የመረጃ ተደራሽነት ከማስፋት ባለፈ የአገሪቱን ዕድገት ለማገዝ ይጠቅማሉ።

በተጨማሪ መልካም አስተዳደርን ለማስፈንና ቀልጣፋ አገልግሎትን ለመስጠት ሚናው የጎላ ነው፡፡

በአገሪቱ 42 ሚሊዮን የሚሆኑ ዜጎች የሞባይል ተጠቃሚ መሆናቸውን የገለጹት ሚኒስትሩ መረጃዎችን በቀላሉ ወደ ወደ ህብረተሰቡ ለማድረስ የሞባይል አፕልኬሽኖች ወሳኝ ሚና አላቸው።

በተለይ ማህበራት አሰራራቸው የተቀላጠፈ እንዲሆንና አቅማቸውን በማሳደግ ተወዳዳሪ እንዲሆኑ የሚያስችል  እንደሆነ ጠቁመዋል።

በአሁኑ ጊዜ በአፕልኬሽኖቹ እንዲካተቱ ከተደረጉ ተቋማት መካከል ቱሪዝም ኮሚሽን፣ የገቢዎችና ጉምሩክ ባለስልጣን፣ የፌደራል ፖሊስ፣ የኢትዮጵያ ብሮድካስቲን ኮርፖሬሽን፣ የኢትዮጵያ ኢንቨስትመንት ኮሚሽን፣ የውጭ ጉዳይ ሚኒስቴር፣ የግብርና ሚኒስቴር፣ የህዝብ እንባ ጠባቂ ተቋምና የህዝብ ተወካዮች ምክር ቤት መረጃ ይጠቀሳል።

ስለ እነዚህ ተቋማት መረጃ ማግኘት የሚፈልግ የአገር ውስጥም ሆነ የውጭ አገር ዜጋ መረጃው ፈላጊዎች በሞባይሎቻቻው በማስጫንና በኢንተርኔት መጠቀም ይችላሉ ብለዋል።

ይህንንም www. apps.gov.et መረጃዎችን በድህረገጽ መጠቀም እንደሚችሉ ተጠቁሟል።

ሚኒስቴሩ የኢንፎርሜሽን ፖርታሎችን በማልማት ከዚህ ቀደም በስራ ላይ መዋሉን የጠቆሙት ዶ/ር ደብረጽዮን  በዛሬው ዕለትም ለማህበራት ጥቅም ላይ የዋሉ ስምንት ዌብ ፖርታሎች ለአገልግሎት ክፍት ሆነዋል።

የግል ዘርፉ የመገበያያ አድማሱን ለማስፋት በአገሪቱ ዕድገት ያለውን ተሳትፎ ለማሳደግ  ያግዛል ብለዋል።

በተጨማሪም የግል አማካሪ ድርጅቶችንና የውስጥ አቅምን በመጠቀም ተጨማሪ የኢንፎርሜሽን ፖርታሎች ወደ ስራ እንዲገቡ ተደርጓል።

በግል አማካሪ ድርጅቶች የኢትዮጵያ ቆዳ ኢንዱስትሪዎች ማህበርና ለአዲስ አበባ ሆቴሎች የንግድ ዘርፍ ማህበራት ለአገልግሎት ክፍት ሆነዋል።

በሚኒስቴሩ ደግሞ የፐብሊክ ሰርቪስ ሰራተኞች አገልግሎት ድርጅት፣ ለኢትዮጵያ ሆልቲካልቸር ልማት ኤጀንሲ፣ ለትምህርት ኢንፎርሜሽንንና ኮሙኒኬሽን ቴክኖሎጂ ማዕከልና ለኢትዮጵያ አካልጉዳተኞች በጎ አድራጎት ማዕከል የኢንፎርሜሽን ፖርታሎች ለአገልግሎት በቅተዋል።

ለጥቃቅንና አነስተኛ ማህበራት አንድ ሮል ሞዴል ማኔጅመንት ኢንፎርሜሽን ሲስተም የተለቀቀላቸው ሲሆን በዚህም የማህበራት አሰራር የተቀላጠፈ አንዲሆን አቅማቸውን በማሳደግ ተወዳዳሪ እንዲሆኑ የሚስችል ነው።

በቀጣይ ለብሔራዊ ፕላን ኮሚሽን፣ ለኢትዮጵያ መንገዶች ባለስልጣን፣ ለአሳ ሃብት ሚኒስቴርና ለብሔራዎ ቤተመዛግብት ኤጀንሲ የተለያዩ ፖርታሎች በውስጥ አቅም በመልማት  ላይ እንደሚገኙ ገልጸዋል።

ተቋማትም ተግባራዊ የሆኑ የአፕሊኬሽኖች መረጃዎችን ወቅታዊ በማድረግ ህብረተሰቡ እንዲገለገል ማድረግ እንደሚጠበቅባቸው ተገልጿል።

ሚኒስቴሩ በዘርፉ የሰለጠነ የሰው ሃይል በማፍራትና በማሰልጠን እንደሚሰራም ጠቁመዋል።