Back

ባለፉት 15 ቀናት 12 ነጥብ 5 ሚሊየን ብር የሚገመት የኮንትሮባንድ ዕቃ በቁጥጥር ስር ዋለ

ኦቢኤን  የካቲት 30 2011- ባለፉት 15 ቀናት አጠቃላይ ግምታዊ ዋጋቸው 12 ነጥብ 5 ሚሊየን ብር የሚገመት የኮንትሮባንድ ዕቃ በአፋር ክልል በቁጥጥር ስር መዋሉን የገቢዎች ሚኒስቴር አስታወቀ።

ከእነዚህም ውስጥ ግምታዊ ዋጋቸው 4 ነጥብ 5 ሚሊየን ብር የሆነ የተለያዩ የኮንትሮባንድ ዕቃዎች ከሀገር ሲወጡና ሲገቡ መያዛቸውን ሚኒስቴሩ ገልጿል።

በቁጥጥር ስር የዋሉት ዕቃዎች ውስጥም በስድስት አይሱዙ ተሽከርካሪዎች ተጭኖ ከሀገር ሊወጣ የነበረ 235 በርሜል ወይም 48 ሺህ 160 ሊትር ነዳጅ ይገኝበታል።

በሶስት አስየዙዙ ተሽከርካሪዎች የተጫኑ 75 የቀንድ ከብቶች፣ በ3 ሲኖትራክ ተሽከርካሪዎች የተጫኑ 12 በንድል የአርማታ ብረት በአንድ ተሳቡ ተሽከርካሪ የተጫነ 450 ኩንታል ጤፍ ከሀገር ሊወጡ ሲሉ በቁጥጥር ስር ውለዋል።

እንዲሁም ተለያዩ አልባሳት በ15 ግመሎች ተጭነው ወደ ሀገር ሲገቡም የተያዙ ሲሆን፥ በአጠቃላይ ከነዚህ የኮንትሮባንድ እቃዎች ጋር የተያዙ 36 ተጠርጣሪዎች በምርመራ ላይ ይገኛሉ ብሏል ሚኒስቴሩ።

እቃዎቹ የተያዙት በቡሬ እና ጋላፊ ልዩ ስሙ ገመሬ ተራራ አካባቢ መሆኑንም ከገቢዎች ሚኒስቴር ያገኘነው መረጃ ያመለክታል።

ከዚህ በተጨማሪ 8 ሚሊየን ብር ግምት ያላቸው እያንዳንዳቸው 230 ኩንታል ኮንትሮባንድ ዱቄት የጫኑ 8 ተሽከርካሪዎች፣ የተሽከርካሪ ጋቢና እና የእንስሳት መኖ ፉርሽካ የጫነ አንድ ተሽከርካሪ ከሀገር ሲወጡ በቁጥጥር ስር ውለዋል።

የኮንትሮባንድ እቃዎቹ በቁጥጥር ስር የዋሉት ከህብረተሰቡ በደረሰን ጥቆማ ተከትሎ የጉምሩክ ሰራተኞች፣ ፌደራልና የክልሉ ፓሊስ እና በመከላከያ ሰራዊት ትብብር ነው።