Back

በሐረር ከተማ ዘመናዊ ስታዲየም ሊገነባ ነው

ጥር 29፣2008

በሐረሪ ክልል የስፖርት ልማት ዘርፉን ለማጎልበትና በመጪው ዓመት የሚከበረውን የብሔር ብሔረሰቦችና ሕዝቦች ቀንን በድምቀት ለማክበር አንድ ቢሊዮን ብር በሚጠጋ ወጪ በሐረር ከተማ ዘመናዊ ስታዲየም እንደሚገነባ የዞኑ ስፖርት ኮሚሽን ገለጸ።

በዓሉን በድምቀት ለማክበር የክልሉ የብሔር ብሔረሰብና ህዝቦች አስተባባሪ ምክር ቤትና ጽህፈት ቤት ተቋቁሞ የዝግጅት ሥራዎች መጀመራቸው ተመልክቷል።

የክልሉ ስፖርት ኮሚሽን ኮሚሽነር አቶ አብዱላዚዝ መሀመድ ለኢዜአ እንደገለጹት በከተማው ዲያስፖራ መንደር በተባለው አካባቢ የሚገነባው ዘመናዊ ስታድየም 50 ሺህ ተመልካች የመያዝ አቅም ይኖረዋል።

የስታድየሙ ግንባታ ሥራ በየካቲት ወር እንደሚጀመርና በአሥር ወራት ጊዜ ውስጥም የግንባታ ሥራው 30 በመቶ ተጠናቆ የብሄር ብሄረሰቦች በዓልን በስታድየሙ ለማክበር መታቀዱን ተናግረዋል።

በግንባታ ሥራው በክልሉ በጥቃቅንና አነስተኛ የተደራጁ በርካታ ማህበራትና ወጣቶች የሥራ እድል በማግኘት የቴክኖሎጂ ልምድ ልውውጥ  እንዲያደርጉ ዕድል ይፈጥራል ብለዋል።

ዘመናዊ ስታዲየም በከተማው መገንባቱ ሀገር አቀፍና ዓለም አቀፍ ውድድሮችን በማስተናገድ በክልሉ የሚከናወነውን የስፖርት ልማትና ተተኪ ወጣቶችን የማፍራት ስራን እንደሚያጎለብተው ገልጸዋል።

በተጨማሪም በከተማው ለሚገኘው የኢማም አህመድ ስታዲየም ከ45 ሚሊዮን ብር በሚበልጥ ወጪ የሳር ተከላ፣ የፕላስቲክ ወንበር የመግጠምና የፓውዛ መብራት ተከላ ሥራ እየተከናወነ መሆኑን ገልጸዋል።

በሌላ በኩል ደግሞ የክልሉ የብሔር ብሔረሰቦችና ሕዝቦች በዓል አስተባባሪ ምክር ቤትና ጽህፈት ቤት ተቋቁሞ የዝግጅት ሥራዎች መጀመራቸውን የጽህፈት ቤቱ ኃላፊ  አቶ አብዱልሃኪም አብዱረሃማን ተናግረዋል።

በዚህም ከተማዋን የማስዋብና ጽዳቷን የመጠበቅ፣ የውስጥ ለውስጥ መንገድ የማስፋፋት፣ የሀረሪ ባህል ማዕከል ግንባታ ሥራ የማፋጠንና ሌሎች ሥራዎችም በእየተከናወኑ እንደሚገኙ ተናግረዋል።

በከተማው የሚገኘው የሐኪም ጋራ ጠጠር አምራች የህብረት ሥራ ማህበር ሊቀመንበር ወጣት ዘነበ ገብረጊዮርጊስ እንደተናገረው፣ የስታድየሙ መገንባት በክልሉ የተዳከመውን የስፖርት እንቅስቃሴ ለማጠናከር መንገድ ከመክፈቱ በተጨማሪ በጥቃቅንና አነስተኛ ደረጃ ለተደራጁ ወጣቶች የስራ ዕድል ይፈጥራል ብለዋል።

ባለፈው ህዳር 29 በጋምቤላ ክልል አስተናጋጅነት በተከበረው የብሔር ብሔረሰቦችና ሕዝቦች ቀን የሐረሪ ክልል የ2009 ዓ.ም የበዓሉ አዘጋጅ ክልል ሆኖ መመረጡ ይታወሳል።