Back

ዙርካን የባህል ስፖርት ውድድር በኢትዮጵያ ሊካሄድ ነው

ህዳር 29፣ 2008

መሰረቱ በኢራን መሆኑ የሚነገርለት ዙርካን የባህል ስፖርት የአፍሪካ ጨዋታዎች ከመጪው አርብ ጀምሮ በኢትዮጵያ አስተናጋጅነት ሊካሄድ ነው፡፡

20 የሚደርሱ የአፍሪካ ሀገራት ይሳተፉበታል ፡፡

2ኛው የአፍሪካ የዙርካን ባህላዊ ስፖርታዊ ጨዋታዎች ከአርብ ጀምሮ ለአምስት ተከታታይ ቀናት በኢትዮጵያ ወጣቶች ስፖርት አካዳሚ ይካሄዳል፡፡

ውድድሩን አስመልክቶ ዛሬ ህዳር 29/2008 ዓ.ም ገርጂ በሚገኘው የወጣቶችና ስፖርት አካዳሚ መግለጫ ተሰጥቷል፡፡

የአፍሪካ ዙርካን ፌዴሬሽን ፕሬዝዳንት መሃመድ ባሬዞ ኢትዮጵያን ተመራጭ ያደረግነው ሁሉንም የአፍሪካ አገራት የምትወክል የሁሉም አፍሪካዊያን ቤት ስለሆነች ነው ብለዋል፡፡

ኢትዮጵያ ኃላፊነቱን በመረከቧም አመስግነዋል፡፡

የአፍሪካ ዙርካን ፌዴሬሽንን በመደገፍ ውድድሩ እንዲደረግ ያደረገው የአፍሪካ ህብረት ተወካይ ሆነው መግለጫው ላይ የተገኙት ማቻቻ ዴፋንቺ በአፍሪካ የሚገኙ ስፖርታዊ እንቅስቃሴዎችን መደገፍ ኃላፊነት ስላለብን ውድድሩ የተሳካ እንዲሆን የተግባር ድጋፍ እንሰጣለን ብለዋል፡፡

ከኢ.ፌ.ድ.ሪ የወጣቶችና ስፖርት ሚኒስቴር ተወካይ የነበሩት አቶ ተስፋዬ በቀለም ውድድሩ ተጠናቆ እስኪፈፀም አስፈላጊውን ድጋፍ እንደሚደረግላቸው ገልፀዋል፡፡

ሪፖርተር፡-ግርማ በቀለ