Back

በስምንተኛ ሳምንት የሊጉ ጨዋታ ኢትዮጵያ ቡናን ከቅዱስ ጊዮርጊስ አገናኝቷልበስምንተኛ ሳምንት የሊጉ ጨዋታ ኢትዮጵያ ቡናን ከቅዱስ ጊዮርጊስ አገናኝቷል

 

 

 

 

[ ኦሬቴድ 21 04 2009 የኢትዮጵያ ፕሪሚዬር ሊግ ስምንተኛ ሳምንት ጨዋታ የኢትዮጵያ ቡና እና ቅዱስ ጊዮርጊስ ደርቢን አገናኝቷል።

የፕሪሚዬር ሊጉ ጨዋታዎች ቅዳሜና እሁድ በክልልና በአዲስ አበባ ስታዲየም ይካሄዳሉ።

ኢትዮጵያ ቡና እና የቅዱስ ጊዮርጊስ ደረቢ እሁድ ከቀኑ 10፡00 በአዲስ አበባ ስታዲየም የሚካሄድ ይሆናል።

ቅዱስ ጊዮርጊስ 14 ነጥብ በመሰብሰብ በሊጉ አናት ላይ ሲገኝ፤ ኢትዮጵያ ቡና ደግሞ በሰባት ነጥብ 12ኛ ደረጃ ላይ ተቀምጧል።

በሁለቱም ክለቦች በደረጃና በወቅታዊ አቋም ሰፊ ልዩነት ቢኖርም በአገሪቱ ካሉት ክለቦች ከፍተኛውን የደጋፊ ቁጥር በመያዛቸው ከጨዋታው ይልቅ በደጋፊዎች መካከል ያለው ህብረ ዝማሬና ፉክክር በጉጉት እንዲጠበቅ አድርጎታል።

ኢትዮጵያ ቡና በሊጉ አጀማመር መልካም የሚባል አይደለም፤ በአንጻሩ ቅዱስ ጊዮርጊስ ጥሩ ውጤት በማስመዝገብ የሊጉ መሪ ነው።

በሰባተኛው ሳምንት ቅዱስ ጊዮርጊስ ወላይታ ድቻን 2 ለ 0 በማሸነፍ እንዲሁም ኢትዮጵያ ቡና ከድሬዳዋ ከነማ ጋር አቻ ውጤት በኋላ ነው ውድድራቸውን የሚያደርጉት።

ቅዱስ ጊዮርጊስ እስካሁን ካደረጋቸው ሰባት ጨዋታዎች በአራት ጨዋታዎች አሸንፎ፣ በአንድ ጨዋታ ተሸንፎ ቀሪ ሁለት ጨዋታዎች በአቻ ውጤት ማጠናቀቅ ችሏል።

ኢትዮጵያ ቡና በበኩሉ አንድ አሸንፎ፣ በአራት ጨዋታዎች አቻ ወጥቶ በሁለት ጨዋታዎች ደግሞ ሽንፈት ገጥሞታል።

ሁለቱም ክለቦች በ 2008 የውድድር ዘመን ያደርጓቸውን ሁለት ጨዋታዎች ያለምንም ግብ አቻ መለያየታቸው ይታወሳል።

ነገ ሰባት ጨዋታዎች ሲካሄዱ በክልል አምስት፣ በአዲስ አበባ ስታዲየም ደግሞ ሁለት ጨዋታዎች ይደረጋሉ። 

ድሬዋዳ ላይ ድሬዳዋ ከነማ ከአርባ ምንጭ ከነማ፣ ወላይታ ላይ ወላይታ ድቻ ከወልዲያ፣ ይርጋዓለም ላይ የደቡብ ደርቢ ሲዳማ ቡና ከሀዋሳ ከነማ በዘጠኝ ሰዓት ይፋለማሉ።

ጎንደር ላይ በዘንድሮው ዓመት ወደ ሊጉ የተቀላቀለውና አንድ ተስተካካይ ጨዋታ የቀረው ጥሩ አቋም በማሳየት አራተኛ ደረጃ የሚገኘው ፋሲል ከነማ በሊጉ መጨረሻ ደረጃ ላይ ከሚገኘው ኢትዮ-ኤሌክትሪክ ጋር ይጫወታል።

ባላፈው ሳምንት ፋሲል ከነማ ከሜዳው ውጭ ጅማ አባቡናን  3 ለ 1 በሆነ ውጤት ማሸነፉ ይታወሳል።

ኢትዮ-ኤሌክትሪክ እስካሁን ካደረጋቸው ሰባት ጨዋታዎች ማግኘት ከሚገባው 21 ነጥብ ያገኘው አራት ነጥብ ብቻ ነው።

የኦሮሚያ ደርቢ ከመሪዎች ጋር ለአንደኝነት በፉክክር የሚገኘው አዳማ ከነማ በፋሲል ሽንፈት ካስተናገደው ጅማ አባቡና ጋር በአዳማ አበበ ቢቂላ ስታዲየም ይጫወታሉ።

ደደቢት ከኢትዮጵያ ንግድ ባንክና መከላከያ ከአዲስ አበባ ከነማ  9፡00 እና 11፡30 በአዲስ አበባ ስታዲየም የጫወታሉ።

 እንግዳው ክለብ አዲስ አበባ ከነማ አጀማመሩ መልካም ቢሆንም ድል እየራቀው መጥቷል፤ በሰባተኛው ሳምንት ከደደቢት ጋር ያደረገው ጨዋታ  ሽንፈትን ማስተናገዱ ይታወሳል።

 ቅዱስ ጊዮርጊስ ደደቢትና አዳማ ከነማ በእኩል 14 ነጥብ በግብ ክፍያ ተበላልጠው ከአንደኛ እስከ ሶስተኛ ያለውን ደረጃ ይዘዋል፡፡ 

ሀዋሳ ከነማ፣ አዲስ አበባ ከነማ እንዲሁም ኢትዮ-ኤሌክትሪክ እንደ ቀደም ተከተላቸው ከ 14ኛ እስከ 16ኛ ያለውን ደረጃ ይዘዋል።