Back

የኢትዮጵያ ፕሪሚየር ሊግ ሁለተኛ ዙር ውድድር ከነገ በስቲያ ይጀምራል

[OBN 13 07 2010] የኢትዮጵያ ፕሪሚየር ሊግ የሁለተኛ ዙር ውድድር ከነገ በስቲያ በሚካሄዱ ጨዋታዎች ይጀመራል። ውድድሩ መጋቢት 8 ቀን 2010 ዓ.ም ይጀመራል ተብሎ የነበረ ቢሆንም ክለቦች በቂ የእረፍትና የዝግጅት ጊዜ አላገኘንም በማለታቸው የኢትዮጵያ እግር ኳስ ፌዴሬሽን ለአንድ ሣምንት ማራዘሙ ይታወሳል።

በዚሁ መሰረት የፕሪሚየር ሊጉ የሁለተኛ ዙር ጨዋታዎች ቅዳሜና እሁድ በአዲስ አበባና በክልል ስታዲየሞች ይካሄዳሉ። መከላከያና ኢትዮ-ኤሌክትሪክ ቅዳሜ በአዲስ አበባ ስታዲየም ከቀኑ አስር ሠዓት ጨዋታቸውን ያደርጋሉ።

በጎንደር አፄ ፋሲል ስታዲየም መካሄድ የነበረበት የፋሲል ከተማና የወልዋሎ አዲግራት ዩኒቨርሲቲ ጨዋታም ቅዳሜ በ8፡00 ሠዓት በአዲስ አበባ ስታዲየም እንደሚካሄድ ፌዴሬሽኑ አስታውቋል። በመቀሌ ስታዲየም መቀሌ ከተማ ከአርባምንጭ ከተማ፣ በይርጋለም ስታዲየም ሲዳማ ቡና ከኢትዮጵያ ቡና፣ ሃዋሳ ላይ ሃዋሳ ከተማ ከጅማ አባ ጅፋር ቅዳሜ 9፡00 ሠዓት ይጋጠማሉ።

በተመሳሳይ ድሬዳዋ ላይ ድሬዳዋ ከተማ ከቅዱስ ጊዮርጊስ፣ በአዳማ አበበ በቂላ ስታዲየም ደግሞ አዳማ ከተማ ከወልዲያ ከተማ ቅዳሜ በ ዘጠኝ ሰአት ላይ ጨዋታቸውን ያደርጋሉ።
እሁድ በሶዶ ስታዲየም ላይ ወላይታ ድቻና ደደቢት ከቀኑ ዘጠኝ ሠዓት ይጫወታሉ።

በ2010 ዓ.ም የፕሪሚየር ሊጉ የመጀመሪያ ዙር ጨዋታ ደደቢት በ29 ነጥብ ቀዳሚነቱን ሲይዝ፣ ጅማ አባጅፋርና መቐለ ከተማ በተመሳሳይ በ25 ነጥብ በጎል ተበላልጠው 2ኛ እና 3ኛ ደረጃን ይዘዋል። የከፍተኛ ጎል አግቢነቱን ኦኪኪ አፎላቢ ከጅማ አባጅፋር እንዲሁም ጌታነህ ከበደ ከደደቢት በተመሳሳይ በዘጠኝ ጎል እየመሩ ነው የመጀመሪያው ዙር የ2010 የኢትዮጵያ ፕሪሚየር ሊግ የተጠናቀቀው። Source:- ENA

No automatic alt text available.