Back

ጅማ አባጅፋር የኢትዮጵያ ፕሪምየር ሊግ ሻምፕዮን ሆነ

[ኦቢኤን 09 11 2010]:-  በኢትዮጵያ ፕሪምየር ሊግ ዘንድሮ ሊጉን የተቀላቀለው ጅማ አባ ጅፋር ሻምፕዮን ሆነ፡፡

ጅማ አባጅፋር የፕሪምየር ሊጉ ሻምፕዮነት ክብሩን ያነሳው አዳማ ከተማን 5 ለ 0 በሆነ ሰፊ ውጤት በመርታት ነው፡፡

ጅማ አባጅፋር በዓመቱ ውስጥ ባካሄዳቸው 30 ጨዋታዎች 55 ነጥቦችን በመሰብሰብ ነው የሻምዮንነት ክብሩን የተቀዳጀው፡፡

በተመሳሳይ 55 ነጥብ በመያዝ ዋንጫውን ለማንሳት ሰፊ እድል የነበረው ቅዱስ ጊዮርጊስ ሐዋሳ ከተማን 2 ለ 0 በሆነ ውጤት አሸንፋል፡፡

ሆኖም ጅማ አባጅፋር አዳማ ከተማን በሰፊ የግብ ልዩነት መርታት በመቻሉ የዋንጫ ባለቤት ሊሆን ችሏል፡፡

የኢትዮጵያ ፕሪምየር ሊግ ከተጀመረ 20 ዓመታትን ያስቆጠረ ሲሆን ቅዱስ ጊዮርጊስ አስራ አራቱን ዋንጫዎች አንስቷል፡፡

ቅዱስ ጊዮርጊስ ፕሪምየር ሊጉን ለተከታታይ አራት ዓመታት ያነሳ ሲሆን ዘንድሮ ዋንጫውን ቢያነሳ የራሱን ሪከርድ በማሻሻል ለአምስተኛ ጊዜ ይሆንለት ነበር፡፡

እስከ አሁን ፕሪምየር ሊጉን ሐዋሰ ከተማና ኢትዮ ኤሌክትሪክ ሁለት ጊዜ ሲያነሱ ደደቢትና ኢትዮጵያ ቡና አንድ አንድ ጊዜ አንስተዋል፡፡

በ1990 ፕሪምየር ሊጉ እንደ አዲስ ሲዋቀር ስምንት ቡድኖችን በመያዝ ነበር ውድድሩን የጀመረው፡፡